Hai Ghazal Mir Ye Shifai Ki
hai ghazal 'mir' ye 'shifai' ki
hum ne bhi taba-azmai ki
us ke ifa-e-ahd tak na jiye
umr ne hum se bewafai ki
wasl ke din ki aarzu hi rahi
shab na aaKHir hui judai ki
isi taqrib us gali mein rahe
minnaten hain shikasta-pai ki
dil mein us shoKH ke na ki tasir
aah ne aah na-rasai ki
kasa-e-chashm le ke jun nargis
hum ne didar ki gadai ki
zor o zar kuchh na tha to bar-e-'mir'
kis bharose par aashnai ki
Mir Taqi Mir 
(505) Peoples Rate This