Do Din Se Kuchh Bani Thi So Phir Shab BigaD Gai
do din se kuchh bani thi so phir shab bigaD gai
sohbat hamari yar se beDhab bigaD gai
washud kuchh aage aah si hoti thi dil ke tain
iqlim-e-ashiqi ki hawa ab bigaD gai
garmi ne dil ki hijr mein us ke jala diya
shayad ki ehtiyat se ye tab bigaD gai
KHat ne nikal ke naqsh dilon ke uTha diye
surat buton ki achchhi jo thi sab bigaD gai
baham suluk tha to uThate the narm garm
kahe ko 'mir' koi dabe jab bigaD gai
Mir Taqi Mir 
(382) Peoples Rate This