Dil Par KHun Hai Yahan Tujhko Guman Hai Shisha
dil par KHun hai yahan tujh ko guman hai shisha
shaiKH kyun mast hua hai to kahan hai shisha
shisha-bazi to tanik dekhne aa aankhon ki
har palak par mere ashkon se rawan hai shisha
ru-safedi hai naqab-e-ruKH shor-e-masti
rish-e-qazi ke sabab pamba-dahan hai shisha
manzil-e-masti ko pahunche hai unhen se aalam
nisha-e-mai-balad wa sang-e-nishan hai shisha
darmiyan halqa-e-mastan ke shab us ki ja thi
daur-e-saghar mein magar pir-e-mughan hai shisha
ja ke puchha jo main ye kar-gah-e-mina mein
dil ki surat ka bhi ai shisha-garan hai shisha
kahne lage ki kidhar phirta hai bahka ai mast
har tarah ka jo tu dekhe hai ki yan hai shisha
dil hi sare the pe ek waqt mein jo kar ke gudaz
shakl shishe ki banae hain kahan hai shisha
jhuk gaya dekh ke main 'mir' use majlis mein
chashm-e-bad-dur trahdar jawan hai shisha
Mir Taqi Mir 
(525) Peoples Rate This