Aarzuen Hazar Rakhte Hain
aarzuen hazar rakhte hain
to bhi hum dil ko mar rakhte hain
barq kam-hausla hai hum bhi to
dil ko be-qarar rakhte hain
ghair hi maurid-e-inayat hai
hum bhi to tum se pyar rakhte hain
na nigah ne payam ne wada
nam ko hum bhi yar rakhte hain
hum se KHush-zamzama kahan yun to
lab o lahja hazar rakhte hain
choTTe dil ke hain butan mashhur
bas yahi e'tibar rakhte hain
phir bhi karte hain 'mir' sahab ishq
hain jawan iKHtiyar rakhte hain
Mir Taqi Mir 
(483) Peoples Rate This