Ai Dasht-e-arzu Mujhe Manzil Ki Aas De
ai dasht-e-arzu mujhe manzil ki aas de
meri thakan ko gard-e-safar ka libas de
parwardigar tu ne samundar to de diye
ab mere KHushk honTon ko sahra ki pyas de
fursat kahan ki zehan masail se laD saken
is nasl ko kitab na de iqtibas de
aansu na pi sakenge ye tanhaiyon ka zahr
baKHsha hai gham mujhe to koi gham-shanas de
lafzon mein jazb ho gaya sab zindagi ka zahar
lahja bacha hai is ko ghazal ki miThas de
Meraj Faizabadi 
(1253) Peoples Rate This