Naza Mein Gar Meri Baalin Pe Tu Aaya Hota
naza mein gar meri baalin pe tu aaya hota
is tarah ashk main aankhon mein na laya hota
mere KHurshid na hota ye mera roz-e-siyah
tu ne gar zulf mein mukhDa na chhupaya hota
bagh-e-jannat mein bhi kya KHub guzarti meri
wan bhi sar par jo teri zulf ka saya hota
naseha chaak-e-gareban ke silane se husul
chaak aankhon ka meri tu ne silaya hota
phul paDta na 'KHaliq' aatish-e-gul se us par
aashiyan hum ne Tuk uncha jo banaya hota
Meer Mustahsan Khaleeq 
(460) Peoples Rate This