Le Chuke Dil To Jang Kya Hai Ab
le chuke dil to jang kya hai ab
aa milo phir darang kya hai ab
pi gae KHum ke KHum na ki masti
yan sharab-e-farang kya hai ab
us nigah ka hai dil jarahat-kash
zaKHm-e-tegh-o-KHadang kya hai ab
hun main dariya-e-ishq ka ghawwas
KHauf-e-kaam-nahang kya hai ab
did o wa-did to hue baham
sharm ai shoKH o sang kya hai ab
dil se wahshi ke tain shikar kya
said-e-sher-o-palang kya hai ab
thi jo ruswai ho chuki 'bedar'
pas-e-namus-o-nang kya hai ab
Meer Mohammadi Bedar 
(354) Peoples Rate This