Jab Use Dekha Zara Nazdik Se
jab use dekha zara nazdik se
tab samajh pae hain thoDa Thik se
baat jab hai dil ho KHud hi be-qarar
wo mohabbat kya mile jo bhik se
bhul baiThe qadr-dani ka chalan
log ham-rishta hain ab tazhik se
raushni ka jashn sa hai har taraf
phir bhi chehre hain kai tarik se
ye jali lafzon mein likha tha kahin
inqalab aata hai ek tahrik se
apna bhi andaz hai 'mina' alag
chal rahe hain haT ke thoDa leak se
Meena Naqvi 
(444) Peoples Rate This