Kya Kahen Mahfil Se Teri Kya UTha Kar Le Gae
kya kahen mahfil se teri kya uTha kar le gae
hum mata-e-dard ko tanha uTha kar le gae
dhup ka sahra nazar aata hai ab chaaron taraf
aap to har peD ka saya uTha kar le gae
ab wahi zarre hamare haal par hain KHanda-zan
aasman tak jin ko hum uncha uTha kar le gae
kya gharaz hum ko wahan ab koi bhi aabaad ho
hum to us basti se ghar apna uTha kar le gae
wo to majnun tha raha jo umr bhar sahra-naward
hum jahan pahunche wahin sahra uTha kar le gae
kar na pae rahbar bhi rahnumai jab 'hayat'
hum bhi hairani mein naqsh-e-pa uTha kar le gae
Masooda Hayat 
(455) Peoples Rate This