KHushbu Si Koi Aae To Lagta Hai Ki Tum Ho
KHushbu si koi aae to lagta hai ki tum ho
shisha kahin Takrae to lagta hai ki tum ho
ehsas-e-mohabbat se kisi gosha-e-dil mein
jab choT ubhar aae to lagta hai ki tum ho
pur-kaif hawa mein jo kisi peD ke niche
aanchal mera lahrae to lagta hai ki tum ho
chhune se kabhi baad-e-saba ke mere tan mein
ek barq si lahrae to lagta hai ki tum ho
sar rakh ke jo patthar pe kabhi rah-e-alam mein
kuchh nind si aa jae to lagta hai ki tum ho
jab sham-e-mulaqat paDosi ke makan se
aawaz koi aae to lagta hai ki tum ho
jab shana bhi karne na uThe hath hamara
aur zulf sanwar jae to lagta hai ki tum ho
Masooda Hayat 
(422) Peoples Rate This