Jazb-e-ghairat
wafa ka zauq diya hai teri mohabbat ne
dilon ko fath kiya jazba-e-sharafat ne
teri haya se taqaddus hai aadamiyat ka
kiya hai tujh ko sar-afraaz jazb-e-ghairat ne
chaman mein jis se hai izn-e-shaguft-e-ghuncha-o-gul
gudaz qalb wo baKHsha hai tujh ko qudrat ne
bahut hi kam hain wo shaista-e-nazar jin ko
KHiraj-e-shauq diya zindagi ki azmat ne
har ek be-kas-o-mazlum ki himayat ka
tujhe shuur diya hai KHuda ki rahmat ne
farogh-e-bazm-e-suKHan teri sarparasti se
adab shanas kiya hai teri aqidat ne
shaguftagi dil-e-barbaad ko ata ki hai
tere KHayal tere yaad ki latafat ne
Masood Akhtar Jamal 
(428) Peoples Rate This