Talash-e-kaun-o-makan Hai Na La-makan Ki Talash
talash-e-kaun-o-makan hai na la-makan ki talash
ye zindagi hai gham-e-ishq-e-jawedan ki talash
isi zamin ko hamein aasman banana hai
hamein nahin hai kisi aur aasman ki talash
kisi ko manzil-e-ishrat ka gham hai aur mujhe
hui hai manzil-e-ishrat pe karwan ki talash
ye KHwab hai ki hai tabir-e-KHwab ai gham-e-dil
har ek qadam hai yahan umr-e-raegan ki talash
bahaar-e-lala-o-gul barq-e-be-aman nikli
kahan kahan na rahi mere aashiyan ki talash
jo ho sake to mera gham hi jawedan ho jae
'jamal' mujh ko nahin aish-e-jawedan ki talash
Masood Akhtar Jamal 
(456) Peoples Rate This