KHizr-e-manzil Na Tha Ibn-e-mariyam Na Tha
KHizr-e-manzil na tha ibn-e-mariyam na tha
gham jahan tha koi shamil-e-gham na tha
dil ko apni tabahi ka kuchh gham na tha
us ki aankhon ka irshad mubham na tha
is se pahle bhi sau bar dhaDka tha dil
dil dhaDakne ka lekin ye aalam na tha
kab falak par sitare farozan na the
kab zamin par sitaron ka matam na tha
jam-e-jam mein jo sadiyon sulagta raha
aur kya tha agar KHun-e-adam na tha
us ne puchha na tha 'shor' jab tak mizaj
aankh nam nam na thi dard kam kam na tha
Manzoor Husain Shor 
(423) Peoples Rate This