Id Ka Din Hua Karti Thi Har Ek Raat Mujhe
id ka din hua karti thi har ek raat mujhe
hae wo waqt ki ras aati thi barsat mujhe
kuchh bhi ho tauba mohabbat se na hogi waiz
jaan-o-dil donon se pyari hai meri baat mujhe
jagmagati teri aankhon ki qasam furqat mein
baDe dukh deti hai ye taron bhari raat mujhe
dil ne un ko bhi kiya chashm-e-murawwat ke supurd
aap se the bhi jo kuchh shikwa shikayat mujhe
dukh bhara hun mere nalon se hazar kar naseh
buri malum na ho jae koi baat mujhe
jitne din zist ke baqi hain nichhawar kar dun
phir jo mil jae jawani ki koi raat mujhe
abr-e-baran ke maze luTun main kyunkar 'manzar'
dam bhi lene de meri aankhon ki barsat mujhe
Manzar Lakhnavi 
(370) Peoples Rate This