Be-KHud Aisa Kiya KHauf-e-shab-e-tanhai Ne
be-KHud aisa kiya KHauf-e-shab-e-tanhai ne
subah se shama jala di tere saudai ne
hasb-e-mansha dil-e-pur-shauq ki baaton ka jawab
de diya sharm mein Dubi hui angDai ne
hu ka aalam hua us samt ko uDne lagi KHak
jis taraf ghaur se dekha tere saudai ne
qatl par mere bahae na kisi ne aansu
dad qatil ko di ek ek tamashai ne
puchhne wale bhari bazm mein qatil ko na puchh
nam tera hi agar le diya saudai ne
mangta hun dar-o-diwar se baaton ka jawab
aisa diwana kiya hai gham-e-tanhai ne
hijr ki raaton mein 'manzar' mere kaam aa aa ke
le liya mol charagh-e-shab-e-tanhai ne
Manzar Lakhnavi 
(413) Peoples Rate This