TalKH Suna Hai Ji Tera Arsa Hua NiDhaal Hai
'talKH' suna hai ji tera arsa hua niDhaal hai
KHud se zara nikal ke dekh ek sa sab ka haal hai
samne aa gaya wo jab kar gae dar-guzar use
ab ye talash hai abas mera yahi KHayal hai
rah takega kya koi aa bhi sakega kya koi
chal paDen ya ruke rahen sochna tak muhaal hai
waqt-shikan koi kahan waqt ke hath paD gaya
is ka na kuchh hisab hai aur na koi misal hai
apni har ek chaal par tum jo rahe ho KHanda-zan
mat hai dekhte ho kya aao tumhaari chaal hai
radd o qubul tera haq radd-e-amal hamara haq
ek bhi multaji nahin sab ki nazar sawal hai
'talKH' main is ka aaj tak DhunD nahin saka jawaz
dil ko ye kya sukun hai aur ye kya malal hai
Manmohan Talkh 
(383) Peoples Rate This