Dast-e-pur-KHun Ko Kaf-e-dast-e-nigaran Samjhe
dast-e-pur-KHun ko kaf-e-dast-e-nigaran samjhe
qatl-gah thi jise hum mahfil-e-yaran samjhe
kuchh bhi daman mein nahin KHar-e-malamat ke siwa
ai junun hum bhi kise ku-e-bahaaran samjhe
TuTe dhage hi se karte hain rafu chaak-e-jigar
kaun bechaargi-e-sina-figaran samjhe
han wo bedard to begana hi achchha yaro
jo na tauqir-e-gham-e-dard-gusaran samjhe
KHanda-zan us pe rahe halqa-e-zanjir-e-junun
jo na kuchh manzilat-e-silsila-daran samjhe
aaj se hum ne bhi zaKHmon ko tabassum jaana
razm ko bazm-gah-e-lala-ezaran samjhe
toD den hum jo na talwar to kahiye 'majruh'
tegh-zan kya hunar-e-zaKHm-shiaran samjhe
Majrooh Sultanpuri 
(464) Peoples Rate This