Gesu-e-yar Ko Chehre Pe Bikharta Dekha
gesu-e-yar ko chehre pe bikharta dekha
moajiza dekhiye din raat ko yakja dekha
yun shab-e-hijr mein un ko bhi taDapta dekha
bistar-e-marg pe goya ki masiha dekha
KHud ko bhi husn ka diwana samajh baiTha hai
us pari-chehra ka waiz ne jo shisha dekha
kashmakash qatra-e-ansu ki teri palkon par
hum ne girte hue tare ko larazta dekha
phir wahi yaad-e-guzishta wahi uljhan wahi gham
dil ko un baada-o-saghar se bhi bahla dekha
Majeed Maiman 
(481) Peoples Rate This