Dil Ko Tere KHayal Se Bahla Raha Hun Main
dil ko tere KHayal se bahla raha hun main
yun sham-e-gham ko subh kiye ja raha hun main
waqif hun meri rah ki manzil nahin koi
diwana-war phir bhi baDhe ja raha hun main
main kah raha Thahariye ki aisa bhi kya sitam
wo kah rahe hain chhoDiye ab ja raha hun main
sach hai kisi sanam ki ibaadat gunah hai
phir bhi hasin gunah kiye ja raha hun main
jo kuchh diya hai tere muqaddas KHayal ne
is lazzat-e-dawam ko lauTa raha hun main
kal tak muKHalifin ke charche the har taraf
har bazm ahl-e-zauq pe ab chha raha hun main
Majeed Maiman 
(372) Peoples Rate This