Jhankte Log Khule Darwaze
jhankte log khule darwaze
chand ka shahr bane darwaze
kis ki aahaT ka fusun tari hai
mahw hain aaj baDe darwaze
bol ke den na kabhi diwaren
sar paTaKHte hi rahe darwaze
log mahfuz hue kamron mein
barf ki zad mein rahe darwaze
kabhi suraj ki kabhi zulmat ki
mar sahte hi rahe darwaze
raat-bhar chandni Takrai magar
subh hote hi khule darwaze
dekh wo 'sham' ki aahaT ubhri
dekh wo band hue darwaze
Mahmood Shaam 
(1621) Peoples Rate This