Tark-e-jam-o-subu Na Kar Pae
tark-e-jam-o-subu na kar pae
is liye hum wazu na kar pae
waqt-e-aKHir bhi hazrat-e-naseh
apna munh qibla-ru na kar pae
us ki rahmat ke saeban mein tha
mera shak bhi adu na kar pae
maslahat ki khaDi thi jo diwar
dur us ko kabhu na kar pae
umr bhar dusron ki fikr rahi
apna daman rafu na kar pae
hae majburiyan ki us ke huzur
pesh apna lahu na kar pae
kar li kamre mein KHud-kushi 'ajiz'
us se jab guftugu na kar pae
Laiq Aajiz 
(435) Peoples Rate This