Sahilon Ki KHamushi Ne Jab Fasurda Kar Diya
sahilon ki KHamushi ne jab fasurda kar diya
KHwahishon ki kashtiyon ko gharq-e-dariya kar diya
jism kya tha lazzaton ka ek dariya tha kabhi
har kisi ne pi ke us ko aaj sahra kar diya
aaj baiThe tak rahe hain umr ka KHali gilas
mausamon ka mai-kada ye kis ne suna kar diya
main barahna jism us ka oDh kar phirta raha
jama-poshi ke junun ne mujh ko nanga kar diya
tha yaqinan doston ki saf mein ek dushman mera
be-KHabar pa kar aachanak jis ne hamla kar diya
soch kar sari basarat chhinne wale bata
tu to suraj tha mera kyun mujh ko andha kar diya
wo jo kal tak mangte the mujh se qad mera 'adib'
sher ke naqid ne un ko mujh se uncha kar diya
Krishn Adeeb 
(478) Peoples Rate This