Tujhse Wada Aziz-tar Rakkha
tujh se wada aziz-tar rakkha
wahshaton ko bhi apne ghar rakkha
apni be-chehragi chhupane ko
aaine ko idhar udhar rakkha
ek tera gham hi apni daulat thi
dil mein poshida be-KHatar rakkha
aarzu ne kamal pahchana
aur talluq ko taq par rakkha
is qadar tha udas mausam-e-gul
hum ne aab-e-rawan pe sar rakkha
apni waraftagi chhupane ko
shauq ne hum ko dar-ba-dar rakkha
kalma-e-shukr ki mohabbat ne
hum ko tamhid-e-KHwab par rakkha
un ko samjhane apna harf-e-suKHan
aansuon ko payam par rakkha
Kishwar Naheed 
(391) Peoples Rate This