SurKHi Badan Mein Rang-e-wafa Ki Thi Kuchh Dinon
surKHi badan mein rang-e-wafa ki thi kuchh dinon
tasir ye bhi us ki dua ki thi kuchh dinon
DhunDe se us ke naqsh ulajhte the aur bhi
haalat tamam karb-o-bala ki thi kuchh dinon
kaghaz pe tha likha hua har harf-e-lab-kusha
tahrir jism-e-saut-o-sada ki thi kuchh dinon
shaKHon pe konpalon ko zabanen ata huin
ye dilbari bhi dast-e-saba ki thi kuchh dinon
dil-sozi-e-wafa ko shakebai ki ata
shaistagi ye rang-e-hina ki thi kuchh dinon
ab hai kuduraton ka khula dasht aur main
chahat tamam teri raza ki thi kuchh dinon
kaifiyat-e-nashat thi KHud hi se guftugu
'nahid' ye rida bhi haya ki thi kuchh dinon
Kishwar Naheed 
(382) Peoples Rate This