Mubtala Ek But Ka Hota Hun
mubtala ek but ka hota hun
aaj iman apna khota hun
tegh-e-abru ke tir ishq mein yar
jaan se apni hath dhota hun
jaan legi ye muft ki begar
bar-e-ranj-e-firaq Dhota hun
ghote khata hun bahr-e-ulfat mein
haal par apne aap rota hun
ek jhuTe ke wasf-e-dandan mein
sachche moti sada pirota hun
dil lagata hun un ki mizhgan se
apne haq mein ye kanTe bota hun
gham mein ek mah-wash ke ashkon se
daman-e-asman bhigota hun
baKHt-e-KHufta ka hun dil-e-bedar
kaun shab ai 'waqar' sota hun
Kishan Kumaar Waqaar 
(372) Peoples Rate This