Jab Bhi Barish Meri Aaankhon Mein Utar Jati Hai
jab bhi barish meri aaankhon mein utar jati hai
baadalon mein teri taswir ubhar jati hai
Dubna jin ko ho maqsud wo kab sochte hain
mauj kis samt se aati hai kidhar jati hai
mere ehsas ki binai hai KHushbu us ki
aag ban kar meri rag rag mein utar jati hai
din wahi din hai jo bite teri ummid ke sath
shab wahi shab jo tere sath guzar jati hai
kaisi diwar uTha di mere ham-sae ne
ab sada aati hai koi na udhar jati hai
apne atraf andheron ko basae rakhiye
raushni in se zara aur nikhar jati hai
Khwaja Sajid 
(350) Peoples Rate This