Tujhse Mil Kar Is Qadar Apnon Se Begane Hue
tujh se mil kar is qadar apnon se begane hue
ab to pahchane nahin jate hain pahchane hue
but jinhen hum ne tarasha aur KHudai saunp di
aa gae hain samne patthar wahi tane hue
KHalq ki tohmat se chhuTe sang-e-tiflan se bache
KHub the wo log jo KHud apne diwane hue
is ko kya kahiye ki hum har haal mein jalte rahe
duriyon mein chand the qurbat mein parwane hue
apni surat mein bhi 'KHatir' ek guna sehr tha
aaina-KHanon mein farzane bhi diwane hue
Khatir Ghaznavi 
(575) Peoples Rate This