KHwab Sirf KHwab Hain
1
sham phir tere tasawwur se
mahak uTThi hai
raat hone ko hai
silsile
KHwabon ke
baqi hain
abhi aankhon mein
2
raat ke pichhle pahar
mujh ko teri yaadon ne
bistar-e-KHwab se
bedar kiya
aur ehsas hua be-sar-o-samani ka
sochta hun ki mere pas
zinda rahne ke hain saman bahut
magar teri kami
khalti rahti hai sada
ek be-nam tasawwur ki tarah
Khan Rizwan 
(374) Peoples Rate This