Bahut Mushkil Hai Dariya Par Jaana
bahut mushkil hai dariya par jaana
magar hai kufr himmat haar jaana
bahut mumkin hai qismat muntazir ho
to phir KHwabon mein bhi bedar jaana
na jaana halqa-e-zulmat mein chahe
paDe maqtal pas-e-diwar jaana
ye kah kar wo chala su-e-shahadat
KHuda ke pas kya bimar jaana
amir-e-shahr ka husn-e-tadabbur
raqibon ko bhi apna yar jaana
muqaddar tha jo bach aae salamat
dil-e-inkar ko iqrar jaana
tamanna jit ki ho zindagi mein
to har mahfil mein le kar haar jaana
agar munsif bana wo KHud na hoga
ye raaz us ne sar-e-darbar jaana
ye paiham muflisi jin ka karam hai
unhin ko hum ne palanhaar jaana
lab-o-ruKHsar par tale paDe hain
to kya 'KHalid' pae didar jaana
Khalid Yusuf 
(380) Peoples Rate This