Jo Mere Dil Mein Hai Logon Se Chhupaun Kis Tarah
jo mere dil mein hai logon se chhupaun kis tarah
kanch ke is shahar ko 'KHalid' bachaun kis tarah
tu to pahle se bhi ab masum hai mere liye
main teri izzat ko miTTi mein milaun kis tarah
apna paikar bhi mujhe zindan nazar aane laga
kashmakash mein hun rihai KHud se paun kis tarah
main kisi ke adl ki TuTi hui zanjir hun
mujh pe jo biti hai duniya ko bataun kis tarah
dekh kis aks-e-muqabil jism patthar ho gaya
chhoD kar ab aaina-KHane ko jaun kis tarah
jagte lamhon ki zanjiron mein hun jakDa hua
KHwab ki diwar ke sae mein aaun kis tarah
ratjagon ke shahar mein ja kar use kya ho gaya
wo to kahta tha ki main tujh ko bhulaun kis tarah
Khalid Shirazi 
(447) Peoples Rate This