Ye Kaisi Pyas Hai Main Jism Ke Sarab Mein Hun
ye kaisi pyas hai main jism ke sarab mein hun
nikal ke jaun kidhar kaise iztirab mein hun
chaTan sar pe liye phir raha hun sadiyon se
janam janam se na jaane mein kis azab mein hun
tu mujh ko bhulna chahe to bhul sakta hai
main ek harf-e-tamanna teri kitab mein hun
main kya hun kaun hun kya chiz mujh mein muzmar hai
kai hijab uThae magar hijab mein hun
bikhar hi jaunga ek zarbat-e-sada to mile
main ek raqs-e-sharar sina-e-rabab mein hun
Khaleel Tanveer 
(402) Peoples Rate This