Mujhko Kabhi Bhi Un Se Shikayat Hui Nahin
mujh ko kabhi bhi un se shikayat hui nahin
shayad isi liye to mohabbat hui nahin
ghairon se mehrbani ki ummid kya karen
hum par to aap ki bhi inayat hui nahin
wo log kuche kuche bhaTakne lage hain aaj
jin ko KHud apne ghar se bhi chahat hui nahin
hum hi to the jo waqt pe hi kaam aa gae
achchha hua ki hum se adawat hui nahin
main ne kabhi kisi ka dukhaya nahin hai dil
mujh ko kabhi kisi se nadamat hui nahin
tufan-e-baad-o-baran mein sab bah gaya 'kiran'
barsat ab ki bais-e-rahmat hui nahin
Kavita Kiran 
(805) Peoples Rate This