Hum Ahl-e-zarf Hain Yun Hi KHafa Nahin Hote
hum ahl-e-zarf hain yun hi KHafa nahin hote
wafa-shiar kabhi bewafa nahin hote
kuchh aise aansu bhi rahte hain meri palkon par
juda to hote hain phir bhi juda nahin hote
jo zaKHm tum ne nawaze hain be-sabab hum ko
kisi bhi dard ka wo masala nahin hote
kaha ye kis ne kahan se ye sun ke aae ho
jo be-sahaara hain wo aasra nahin hote
har ek gam pe jo laDkhaDae rahte hain
ghubar-e-rah mein wo rasta nahin hote
charagh to hain magar itne dhundle dhundle kyun
'kiran' tumhaare to ye naqsh-e-pa nahin hote
Kavita Kiran 
(1269) Peoples Rate This