Karb Hai Karb Ki Aawaz Barabar Hai Yahi
karb hai karb ki aawaz barabar hai yahi
teri qimat hai yahi tera muqaddar hai yahi
ji mein aata hai kisi ghar pe bhi dastak de dun
aur phir puchho ki ai shaKHs mera ghar hai yahi
kaun samjhega agar main ne kahi bhi rudad
chup hi ho jaun mare waste behtar hai yahi
ab to jo zarra bhi daman se lipaT jata hai
main samajhta hun mera mehr-e-munawwar hai yahi
chandni raat mein KHud apne hi sae se milun
mera monis hai yahi ab mera rahbar hai yahi
ab to har laKHt har ek moD pe hota hai guman
jis ke bare mein suna hum ne wo mahshar hai yahi
sher kahne ko bahut hum ne kahe hain 'nuri'
ye jo KHamosh sa baiTha hai suKHnawar hai yahi
Karrar Noori 
(594) Peoples Rate This