Taswir O Tasawwur

wo kab ke aae bhi aur gae bhi nazar mein ab tak sama rahe hain

ye chal rahe hain, wo phir rahe hain, ye aa rahe hain wo ja rahe hain

wahi qayamat hai qadd-e-baala wahi hai surat, wahi sarapa

labon ko jumbish, nigah ko larzish, khaDe hain aur muskura rahe hain

wahi latafat, wahi nazakat, wahi tabassum, wahi tarannum

main naqsh-e-hirman bana hua tha wo naqsh-e-hairat bana rahe hain

KHiram rangin, nizam rangin, kalam rangin, payam rangin

qadam qadam par, rawish rawish par nae nae gul khila rahe hain

shabab rangin, jamal rangin, wo sar se pa tak tamam rangin

tamam rangin bane hue hain, tamam rangin bana rahe hain

tamam ranaiyon ke mazhar, tamam ranginiyon ke manzar

sambhal sambhal kar simaT simaT kar sab ek markaz par aa rahe hain

bahaar-e-rang-o-shabab hi kya sitara o mahtab hi kya

tamam hasti jhuki hui hai, jidhar wo nazren jhuka rahe hain

tuyur sarshaar-e-saghar-e-mul halak-e-tanwir-e-lala-o-gul

sab apni apni dhunon mein mil kar ajab ajab git ga rahe hain

sharab aaankhon se Dhal rahi hai, nazar se masti ubal rahi hai

chhalak rahi hai uchhal rahi hai, piye hue hain pila rahe hain

KHud apne nashshe mein jhumte hain, wo apna munh aap chumte hain

KHarab-e-masti bane hue hain, halak-e-masti bana rahe hain

faza se nashsha baras raha hai, dimagh phulon mein bas raha hai

wo kaun hai jo taras raha hai? sabhi ko mai-kash pila rahe hain

zamin nashsha, zaman nashsha, jahan nashsha, makan nashsha

makan kya? la-makan nashsha, Dubo rahe hain pila rahe hain

wo ru-e-rangin o mauja-e-yam ki jaise daman-e-gul pe shabnam

ye garmi-e-husn ka hai aalam, araq araq mein naha rahe hain

ye mast bulbul bahak rahe hain, qarib-e-ariz chahak rahe hai

gulon ki chhati dhaDak rahi hai, wo dast-e-rangin baDha rahe hain

ye mauj-o-dariya, ye reg-o-sahra ye ghuncha-o-gul, ye mah-o-anjum

zara jo wo muskura diye hain wo sab ke sab muskura rahe hain

faza ye naghmon se bhar gai hai ki mauj-e-dariya Thahar gai hai

sukut-e-naghma bana hua hai, wo jaise kuchh gunguna rahe hain

ab aage jo kuchh bhi ho muqaddar, rahega lekin ye naqsh dil par

hum un ka daman pakaD rahe hain, wo apna daman chhuDa rahe hain

ye ashk jo bah rahe hain paiham, agarche sab hain ye hasil-e-gham

magar ye malum ho raha hai, ki ye bhi kuchh muskura rahe hain

zara jo dam bhar ko aankh jhapki, ye dekhta hun nai tajalli

tilism surat miTa rahe hain, jamal mani bana rahe hain

KHushi se labrez shash-jihat hai, zaban par shor-e-tahniyat hai

ye waqt wo hai 'jigar' ke dil ko wo apne dil se mila rahe hain