Thakan Ki Gard Se KHush-rang AahaTon Mein Aa
thakan ki gard se KHush-rang aahaTon mein aa
adawaton ko bhula de mohabbaton mein aa
na-jaane kab se tera intizar hai mujh ko
ki nind toD ke be-KHwab raston mein aa
mere KHayal ke sae tere badan ke aks
pukarte hain mulaqat ki hadon mein aa
lipaT gai hai mere zehn se teri KHushbu
main jal raha hun ki barish ke mausamon mein aa
safar ki dhup pighal jaegi purani hai
gulab ban ke mahak meri dhaDkanon mein aa
bichhaDna hai to bichhaD ja tabassumon ke sath
jo mujh se pyar hai tujh ko to pattharon mein aa
jo shaKHs shola-e-jaan ban gaya numaish mein
tujhe na luT le wo meri dhaDkanon mein aa
Jazib Quraishi 
(865) Peoples Rate This