Jab Tumhein Yaad Kiya Ranj Hua Bhul Gae
jab tumhein yaad kiya ranj hua bhul gae
hum andheron mein ujale ki faza bhul gae
tum se bichhDe the to jine ka chalan yaad na tha
tum ko dekha hai to marne ki dua bhul gae
tere aansu the ki be-dagh sitaron ke charagh
umr-bhar ke liye hum apni saza bhul gae
hum KHayalon mein tumhein yaad kiye jate hain
aur tum dil ke dhaDakne ki sada bhul gae
pyar mein koi fasilen jo uThae bhi to kya
tum to KHud lazzat-e-uslub-e-wafa bhul gae
kisi mahki hui chhanw mein Thahar ke hum bhi
sang-dil waqt ka andaz-e-jafa bhul gae
kitne nadan hain wo ahl-e-mohabbat 'jazib'
jo har ek baat mohabbat ke siwa bhul gae
Jazib Quraishi 
(991) Peoples Rate This