Mujhe Sirf Ek Din Chahiye
sal ke itne sare dinon mein
mujhe sirf ek din chahiye
tumhaare sath basar karne ke liye
main chahta hun
wo din behad shaffaf ho
tumhaari aankhon ki tarah
behad raushan ho
tumhaare chehre jaisa
aur itna garm
jis qadar tumhaara badan
us din ki shafaq
tumhaare honTon se milti ho
us din ki hawa mein aisi KHushbu ho
jo tumhaari sanson ki mahak yaad dilae
us din ki sham ki siyahi
tumhaari palkon jaisi ho
aur raat
tumhaare baalon se nikli ho
is qadar saf din
mujhe sara sal nahin milta
aur tumhaare sath ek din basar karne ki
meri KHwahish puri nahin hoti
Javed Shaheen 
(877) Peoples Rate This