Najat
KHamosh muhib raat ka
dil dhaDakta hai
andhere ke zabardast hath ne
meri aankhon se nind khasiT li hai
is wahshi sannaTe mein
hawa ki dozaKHi lahron par taDapti hui
ek fariyaad
mujh tak pahunchti na thi
halq par
ghair-mari naKHunon ke dabao se
main kisi ok-e-zaban mein
galiyan deta hun
chand lamhon ke baad
kisi ghair-fitri ghaflat ke panje mujhe jakaD lete hain
is tarah mujhe rihai milti hai
main aazad ho jata hun
Javed Nasir 
(655) Peoples Rate This