مری دعا ہے
خلا کے گہرے سمندروں میں
اگر کہیں کوئی ہے جزیرہ
جہاں کوئی سانس لے رہا ہے
جہاں کوئی دل دھڑک رہا ہے
جہاں ذہانت نے علم کا جام پی لیا ہے
جہاں کے باسی
خلا کے گہرے سمندروں میں
اتارنے کو ہیں اپنے بیڑے
تلاش کرنے کوئی جزیرہ
جہاں کوئی سانس لے رہا ہے
جہاں کوئی دل دھڑک رہا ہے
مری دعا ہے
کہ اس جزیرے میں رہنے والوں کے جسم کا رنگ
اس جزیرے کے رہنے والوں کے جسم کے جتنے رنگ ہیں
ان سے مختلف ہو
بدن کی ہیئت بھی مختلف
اور شکل و صورت بھی مختلف ہو
مری دعا ہے
اگر ہے ان کا بھی کوئی مذہب
تو اس جزیرے کے مذہبوں سے وہ مختلف ہو
مری دعا ہے
کہ اس جزیرے کی سب زبانوں سے مختلف ہو زبان ان کی
مری دعا ہے
خلا کے گہرے سمندروں سے گزر کے
اک دن
اس اجنبی نسل کے جہازی
خلائی بیڑے میں
اس جزیرے تک آئیں
ہم ان کے میزباں ہوں
ہم ان کو حیرت سے دیکھتے ہوں
وہ پاس آ کر
ہمیں اشاروں سے یہ بتائیں
کہ ان سے ہم اتنے مختلف ہیں
کہ ان کو لگتا ہے
اس جزیرے کے رہنے والے
سب ایک سے ہیں
مری دعا ہے
کہ اس جزیرے کے رہنے والے
اس اجنبی نسل کے کہے کا یقین کر لیں
جاوید اختر 
(2249) ووٹ وصول ہوئے
Meri Dua Hai In Urdu By Famous Poet Javed Akhtar. Meri Dua Hai is written by Javed Akhtar. Enjoy reading Meri Dua Hai Poem on Inspiration for Students, Youth, Girls and Boys by Javed Akhtar. Free Dowlonad Meri Dua Hai by Javed Akhtar in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends