Bazm Se Jab Nigar UThta Hai

bazm se jab nigar uThta hai

mere dil se ghubar uThta hai

main jo baiTha hun to wo KHush-qamat

dekh lo bar bar uThta hai

teri surat ko dekh kar meri jaan

KHud-baKHud dil mein pyar uThta hai

us ki gul-gasht se rawish-ba-rawish

rang hi rang yar uThta hai

tere jate hi is KHarabe se

shor-e-girya hazar uThta hai

kaun hai jis ko jaan aziz nahin

le tera jaan-nisar uThta hai

saf-ba-saf aa khaDe hue hain ghazal

dasht se KHaksar uThta hai

hai ye tesha ki ek shoala sa

bar-sar-e-kohsar uThta hai

karb-e-tanhai hai wo shai ki KHuda

aadmi ko pukar uThta hai

tu ne phir kasb-e-zar ka zikr kiya

kahin hum se ye bar uThta hai

lo wo majbur shahr-e-sahra se

aaj diwana-war uThta hai

apne yan to zamane walon ka

rose hi eatibar uThta hai

'jaun' uThta hai yun kaho yani

'mir'-o-'ghaalib' ka yar uThta hai