Go Husn Ki Surat Hain Meri Samt Rawan Bhi
go husn ki surat hain meri samt rawan bhi
ek KHwab si lagti hain mujhe raushaniyan bhi
kuchh apni kaho Dubte taron ko na dekho
shayad na mile phir ye nashat-e-guzaran bhi
socha tha ki luTun teri furqat ke KHazine
dekha na gaya tere bichhaDne ka saman bhi
kuchh dil bhi hai mera gham-e-ayyam se bojhal
kuchh sham ki dahliz se uThta hai dhuan bhi
kis ajnabi rah-raw ke taaqub mein chala hai
paega na tu ret pe qadmon ke nishan bhi
karta hun kabhi chashm-e-taKHayyul se nazara
hota hai kabhi tujh pe mohabbat ka guman bhi
tu hasil-e-manzil bhi mera rah-numa bhi
tu mujh se gurezan bhi qarib-e-rag-e-jaan bhi
Jameel Yusuf 
(774) Peoples Rate This