Dariya Ka ChaDhaw Dekhta Hun
dariya ka chaDhaw dekhta hun
tinkon ka bahaw dekhta hun
tum dekho bulandi aasman ki
main us ka jhukaw dekhta hun
kal pesh-e-nazar thi tegh-e-abru
ab sine ka ghaw dekhta hun
wo aaen na aaen kaun jaane
aai hui naw dekhta hun
santa hun karah lakDiyon ki
jalte hain alaw dekhta hun
aasan nahin hai dil ki chori
tum aankh churao dekhta hun
manjdhaar mein hogi koi kashti
sahil pe jamaw dekhta hun
tum aag mein meri jal rahi ho
main dur se tao dekhta hun
apne ko 'jamil' bechna hai
bazar ka bhaw dekhta hun
Jameel Mazhari 
(794) Peoples Rate This