Ye Manzar Ye Rup Anokhe Sab Shahkar Hamare Hain
ye manzar ye rup anokhe sab shahkar hamare hain
hum ne apne KHun-e-jigar se kya kya naqsh ubhaare hain
sadiyon ke dil ki dhaDkan hai un ki jagti aankhon mein
ye jo falak par hansmukh chanchal jagmag jagmag tare hain
ek zara si bhul pe hum ko itna tu badnam na kar
hum ne apne ghao chhupa kar tere kaj sanware hain
kuchh baaten kuchh raaten kuchh barsaten apna sarmaya
mazi ke andhiyare mein ye jalte dip hamare hain
ek jahan ki khoj mein apne pyar ki nagri chhoD aae
aur zamana ye samjha hum pyar ki bazi haare hain
sab se hans kar milne wale hum ko kisi se bair nahin
duniya hai mahbub hamein aur hum duniya ko pyare hain
Jameel Malik 
(1254) Peoples Rate This