Munh-band Hasraton Ko SuKHan-ashna Karo
munh-band hasraton ko suKHan-ashna karo
toDo sukut saz-e-ghazal ibtida karo
lao kahin se sang-e-malamat hi kyun na ho
yaro shikast-e-shisha-e-dil ki dua karo
masum laghzishon ki bahut dad mil chuki
ab aashna-e-ghair ke tane suna karo
haare hue KHulus pe sharmindagi hai kyun
kis ne nahin kaha tha ki dil ka kiya karo
nadan ho jahan ka chalan dekhte nahin
rasm-e-jafa ko aam ba-nam-e-wafa karo
phir koi jaan-nawaz bahana tarash lo
phir koi dil-fareb achhuti KHata karo
mil jaega 'jamil' koi zaKHm koi phul
aao na tum bhi kucha-e-dil mein sada karo
Jameel Malik 
(1051) Peoples Rate This