Koi Taqrib Ho Lachaariyan Hain
koi taqrib ho lachaariyan hain
baDe logon se rishte-dariyan hain
hamari kaj-kulahi par na jao
abhi hum mein wahi KHuddariyan hain
murawwat aao-bhagTi waza-dari
ye pichhle ahd ki bimariyan hain
KHusha jin ko mayassar aaen ninden
yahan to umr bhar bedariyan hain
nahin hai aadmi ke bas mein kuchh bhi
to phir kahe ki KHud-muKHtariyan hain
wazir-o-mir hon ya shaiKH-o-waiz
sabhi logon mein zahir-dariyan hain
nahin hai monis-e-jaan 'saz' koi
dikhawe ki faqat dil-dariyan hain
Jaleel Saz 
(653) Peoples Rate This