Isi Bais To Duniya Ki Musibat Gham Nahin Hoti
isi bais to duniya ki musibat gham nahin hoti
ye duniya gham to deti hai sharik-e-gham nahin hoti
charaghon mein lahu insaniyat ka jagmagata hai
magar insaniyat ki chashm-e-kam pur-nam nahin hoti
KHushi mahsus karta hun to duniya sath deti hai
musibat mein magar aamada-e-matam nahin hoti
KHushi ki shama to ai dost zad mein aa bhi jati hai
magar dagh-e-jigar ki raushni maddham nahin hoti
saliqa chahiye aawaz ko pahchan lene ka
nawa-e-shairi har dam nawa-e-gham nahin hoti
'jalil' un se bichhaD kar ek zamana ho gaya lekin
abhi tak mere ashkon ki rawani kam nahin hoti
Jaleel Allahabadi 
(705) Peoples Rate This