Karen Kis Liye Hum Kisi Ka Lihaz
karen kis liye hum kisi ka lihaz
kisi ko nahin jab hamara lihaz
musawat us chiz ka nam hai
ki uTh jae chhoTe baDe ka lihaz
lihaz is ka kuchh tum ko bhi chahiye
kiya hum ne kitna tumhaara lihaz
kisi ki koi baat sunta nahin
kisi ko nahin ab kisi ka lihaz
khari baat kahne ke aadi hain hum
na beja murawwat na beja lihaz
jo insan zamane ke kaam aaega
usi ka karega zamana lihaz
na rutba na ohda na zar hai na zor
kare kaun 'sarshaar' tera lihaz
Jaimini Sarshar 
(684) Peoples Rate This