Wo Hamara Ghar
hath mein tabut thame un dinon ke
jin dinon us lalTenon ki gali mein
hum ne mil kar
apne mustaqbil ke is ghar ko sajaya
lalTenon ki gali ka aaKHiri ghar
tera mera ghar
dhup mein sahma khaDa hai
jis ki chhat par
makDiyon ke jal mein uljhe se
KHwab apne
muntashir hain
ghar ki diwaron se uljhi
chinTiyon ki matami si kuchh qataren rengti hain
KHasta shahtiron mein dab kar
ek gaurayya ka ghar
bikhra paDa hai
Jagdeesh Parkash 
(709) Peoples Rate This