Kab IsMein Shak Mujhe Hai Jo Lazzat Hai Qal Mein
kab is mein shak mujhe hai jo lazzat hai qal mein
lekin wo baat is mein kahan hai jo haal mein
dil hai mera ki marka-e-kufr-o-din koi
ek umr kaT gai hai jawab o sawal mein
allah re be-KHudi ki tere ghar ke aas-pas
har dar pe di sada tere dar ke KHayal mein
do nam ek kaifiyat-e-jazb-e-dil ke hain
bas farq is qadar hai firaq o visal mein
aae wo kitni bar nigahon ke ru-ba-ru
us ke libas mein kabhi us ke jamal mein
Jagan Nath Azad 
(843) Peoples Rate This